Veisla að Vestan - Uppskrift af lunda

Hótel Edda á Ísafirði, í samstarfi við Friðrik V, Arnrúnu og Veitingastaðinn Við Pollinn kynntu Mat úr Héraði á Jónsmessunni á Ísafirði. Byrjað var á léttri göngu í Stórurð undir leiðsögn starfsmanna Vesturferða, þar sem Friðrik V kynnti hugtakið Matur úr héraði. Að lokinni göngu var framreiddur veislumatur úr héraði, sem Friðrik V og strákarnir á Við Pollinn undirbjuggu úr Vestfirskum afurðum.

Hjónin Friðrik Valur Karlsson og Arnrún Magnúsdóttir stofnuðu veitingastaðinn Friðrik V árið 2001. Friðrik er útskrifaður frá Hótel- og veitingaskóla Íslands árið 1993. Friðrik sérhæfir sig í að elda úr fersku íslensku hráefni á nútíma, evrópska vísu, og hefur hann getið sér gott orð fyrir "túlkun" sína á íslensku hráefni og matarhefðum.

Pistill Friðriks V í SunnudagsMogganum 4. júlí 2010 að lokinni vel heppnaðri heimsókn á Ísafirði
Eftir ánægjulega Jónsmessugöngu frá Hótel Eddu á Ísafirði finnst mér við hæfi að biðja alla Vestfirðinga afsökunar hversu sjaldan ég hef komið þangað. Ég get fullvissað ykkur um að ég á eftir að koma miklu oftar í framtíðinni. Ég upplifði svolítið eins og ég væri staddur erlendis, allir rosalega gestrisnir og náttúrufegurðin ólýsanleg.

Það verður ekki að Vestfirðingum tekið að þeir hafa haft áhrif á íslenska matargerð í gengum tíðina, þrátt fyrir að eiga þann vafasama heiður að hafa fundið upp kæsta skötu og hákarl þá er þetta nú hráefni sem er alltaf að verða meira og meira í tísku sem sést kannski best á gríðarlegri aðsókn í skötuveislur víðsvegar um landið á Þorláksmessu. Á Vestfjörðum upplifir maður gríðarlegt stolt af hráefninu, þar keppast veitingastaðir við að merkja sig ,,Veislu að vestan”. Má til dæmis nefna Við Pollinn á Hótel Ísafirði. Ég kynntist bæði gamaldags sólþurrkuðum saltfiski og nýmóðins sprautusöltuðum saltfiski sem hvort tveggja var mjög skemmtilegt. Ekki þurfti að labba langt út fyrir bæinn til að finna rabbabara- og hundasúrubreiður. Í Hnífsdal er búinn til gamaldags vindþurrkaður harðfiskur sem allir verða að prófa. Gömlu byggingarnar og söfnin á Ísafirði eru algjör skyldu heimsókn, eins og Gamla bakaríið, einnig er skemmtileg upplifun að borða pönnufiskinn í Tjöruhúsinu þar sem “amatöra-mennskan” svífur yfir vötnum og verður eitthvað svo falleg að manni finnst maður vera staddur í litlu sjávarþorpi á Ítalíu. Fyrir mig var það lundinn úr Vigur sem stóð uppúr, þess vegna finnst mér við hæfi að enda þannan pistil með uppskrift af heitreyktum lunda.

Reyksoðnar lundabringur með eggjahræru og hundasúrum
Forréttur fyrir 4 manns
8 bringur af lunda
150 g sprek af íslenskum villijurtum, má vera reyksuðusag
1 msk fínt salt
1 msk villtar íslenskar jurtir, fín malaðar
1 msk hrásykur
50 g villt ber (mega vera frosin)
100 g hundasúrur
Ólífuolía
4 soðin egg
½ dl rjómi
1 msk smjör

Aðferð
Maukið helminginn af bláberjunum með jurtum og sykri, saltið létt yfir bringurnar og leggið í berjablönduna, setjið í lokað ílát í kæli í 4-6 tíma, að því loknu þerrið bringurnar og látið standa í 10 mín. Setjið hundasúrur í kalt vatn í 12 mín., eftir það eru þær hreinsaðar í salatvindu. Komið sprekum fyrir í reyksuðuboxi, á grilli eða í vokpönnu. Raðið bringunum á grindina, lokið vel, kveikið undir þannig að sprekin gefi frá sér reyk án þess að loga. Slökkvið undir en alls ekki opna reyksuðukassann strax, látið standa í 10 mín., endurtakið þá leikinn þannig reykur myndist, slökkvið undir og geymið í 10 mín. Þá er óhætt að opna og taka bringurnar upp úr. Látið þær standa á meðan eggjahræran er gerð, hitið rjómann upp að suðu og hellið yfir gróft söxuðu eggin og smjörið í mixara og maukið vel. Skerið lundabringurnar í þunnar sneiðar og berið fram með eggjahrærunni, hundasúrunnum eftir að þeim hefur verið velt upp úr ólífuolíunni og saltaðar létt, afganginum af bláberjum og hugsanlega radísum.

Gott í grenndinni.
Friðrik V.
Sunnudags Mogginn 4. júlí 2010